ვლადიმერ (ვალერი) სუხიშვილი – დაიბადა 1939 წლის 18 მაისს გორის რაიონის სოფელ მეჯვრისხევში. 1957 წელს დაამთავრა ამავე სოფლის საშუალო სკოლა, ხოლო 1965 წელს საქართველოს სასოფლო-სამეურნეო ინსტიტუტი სწავლული აგრონომის კვალიფიკაციით. შრომით საქმიანობასთან ერთად, 1972-1975 წლებში სწავლობდა მიწადმოქმედების კვლევითი ინსტიტუტის ასპირანტურაში, მისი დამთავრების შემდეგ დაიცვა დისერტაცია მეცნიერებათა კანდიდატის ხარისხის მოსაპოვებლად და სამეცნიერო საბჭომ ერთხმად მიანიჭა სოფლის მეურნეობის მეცნიერებათა კანდიდატის ხარისხი, ხოლო 2005 წელს სადისერტაციო სამეცნიერო საბჭოზე წარმატებით დაიცვა სოფლის მეურნეობის მეცნიერებათა დოქტორის ხარისხი.

იგი არჩეულია კავკასიის ხალხთა სამეცნიერო აკადემიის წევრად (აკადემიკოსად) და სოფლის მეურნეობის მეცნიერებათა აკადემიის დარგის კოორდინატორად. გამოქვეყნებული აქვს 75-ზე მეტი სამეცნიერო შრომა, მათ შორის 17 უკანასკნელ ხუთ წელიწადში. ვალერი სუხიშვილის აქტივობით შექმნილია ოთხი სახელმძღვანელო, ერთი – მოლოგრაფია და ერთი – პუბლიცისტური ნაშრომი. მნიშვნელოვანია, მისი ფუნდამენტალური გამოსვლები საერთაშორისო და ადგილობრივ ღონისძიებებზე თანამედროვეობის არსებულ პრობლემებზე და მისი გადაჭრის გზებზე.
ევროინტეგრაციის გზაზე, სუხიშვილის უნივერსიტეტის წარმატებულ მიღწევებზე დიდია მისი რექტორის ვალერი სუხიშვილის დამსახურება. 2009 წლის გაზაფხულზე ოქსფორდის საუნივერსიტეტო სამიტზე შთაბეჭდავი იყო მისი გამოსვლა აგვისტოს ომთან დაკავშირებით რუსების მიერ საქართველოზე და კერძოდ გორზე განხორციელებული აგრესიის ფრაგმენტები, რამაც მისი ევროპელი კოლეგების დიდი მოწონება დაიმსახურა.
ვალერი სუხიშვილის ხელმძღვანელობით წარმატებით განხორციელდა ევროპული განათლების პროგრამა, რის შედეგადაც უნივერსიტეტი დაჯილდოვდა ევროპის ხარისხის ნიშნით და ევროპული განათლების ლაურეატის მედლით. იგი 2010 წლიდან არჩეულია ევროპის საუნივერსიტეტო რექტორთა კლუბის წევრად.
ვალერი სუხიშვილი აქტიურად მონაწილეობდა საზოგადოებრივ საქმიანობაში: არჩეული იყო გორის საკრებულოს დეპუტატად, მონაწილეობდა მრავალ სამთავრობო კონფერენციებსა და ყრილობებზე, გარკვეული პერიოდი არჩეული იყო სასამართლოს სახალხო მსაჯულად, აქტიურად მონაწილეობდა მოზარდი თაობის აღზრდის საქმეში, რისთვისაც მიღებული აქვს გოგებაშვილის მედალი.
ვალერი სუხიშვილი ახალგაზრდობიდანვე გამოირჩეოდა თავისი მენეჯერული თვისებებით, წარმატებული იყო მისი მუშაობა ახალგაზრდულ ორგანიზაციებში, სამეურნეო საქმიანობაში და გორის რაიონის ხელმძღვანელად ყოფნის პერიოდში.
1995 წლიდან დღემდე მუშაობს მის მიერვე დაფუძნებული სუხიშვილის სასწავლო უნივერსიტეტი რექტორად. სწორედ მისი ხელმძღვანელობით მიაღწია უნივერსიტეტმა დიდ წარმატებებს, სამი აკრედიტაციის ექსპერტთა მაღალი შეფასება და აკრედიტაციის მინიჭება, სტუდენტთა მაღალი კვალიფიკაცია და მათი დასაქმების მაღალი პროცენტი, რის შედეგადაც ბიზნეს რეიტინგის კვლევის შედეგებით უნივერსიტეტს ორჯერ მიენიჭა ოქროსა და ვერცხლის შეფასების რეიტინგი.
იგი აქტიურად არის ჩაბმული სოფლის მეურნეობის მეცნიერებათა აკადემიის მიერ ფერმერული მეორნეობის მოწყობის პროგრამის შემუშავებაში. ამჟამად ვალერი სუხიშვილი არც ერთი პოლიტიკური გაერთიანების წევრი არ არის. ჰყავს მეუღლე – რუსუდან გოხელაშვილი, შვილი – ეკატერინე სუხიშვილი – მედიცინის დოქტორი, ორი შვილიშვილი და ერთი შვილთაშვილი.